भारतातील सर्वात वृद्ध अब्जाधीश केशव महिंद्रा यांचे निधन, वयाच्या ९९व्या वर्षी फोर्ब्सच्या यादीत
भारतातील सर्वात वृद्ध अब्जाधीश आणि महिंद्रा अँड महिंद्राचे चेअरमन एमेरिटस केशब महिंद्रा यांचे बुधवार, १२ एप्रिल २०२३ रोजी निधन झाले. वयाच्या ९९ व्या वर्षी त्यांनी अखेरचा श्वास घेतला. भारतातील १६ नवीन अब्जाधीशांपैकी २०२३ च्या अलीकडेच प्रसिद्ध झालेल्या फोर्ब्स अब्जाधीशांच्या यादीमध्ये त्यांचा समावेश करण्यात आला होता. महिंद्रा समूहाचे सुमारे ४८ वर्षे नेतृत्व केल्यानंतर केशब महिंद्रा यांनी २०१२ मध्ये अध्यक्षपदाचा राजीनामा दिला. महिंद्राची एकूण संपत्ती १.२ अब्ज डॉलर होती.
केशब महिंद्रा यांचा प्रवास
दिवंगत केशब महिंद्रा यांनी १९४७ मध्ये वडिलांच्या कंपनीत काम करण्यास सुरुवात केली, ज्यानंतर १९६८ मध्ये त्यांना महिंद्रा ग्रुपचे अध्यक्षपद सोपवण्यात आले. केशब महिंद्रा हे उद्योगपती आनंद महिंद्रा यांचे काका होते आणि ते आतापर्यंत महिंद्रा अँड महिंद्राचे (M&M) अध्यक्ष एमेरिटस होते. २०१२ मध्ये ग्रुप चेअरमन पदावरून निवृत्त झाल्यानंतर आनंद महिंद्रा यांच्याकडे समूहाची जबाबदारी सोपवण्यात आली.
कोण होते केशब महिंद्रा?
केशब महिंद्रा यांचा जन्म ९ ऑक्टोबर १९२३ रोजी शिमला येथे झाला. त्यांच्या निधनाने संपूर्ण कॉर्पोरेट जगतात शोककळा पसरली आहे. वयाची शंभरी पार करण्यापूर्वीच ते अब्जाधीशांच्या यादीत पुनरागमन करत ते भूतकाळात चर्चेत राहिले होते आणि काही दिवसांनंतर त्यांच्या मृत्यूची बातमीने सर्वांनाच धक्का बसला आहे. इंडियन नॅशनल स्पेस प्रमोशन अँड ऑथोरायझेशन सेंटरचे (INSPACE) अध्यक्ष पवन गोयंका यांनी ट्विट करत शोक व्यक्त केला.
केशब महिंद्रा यांनी यापूर्वी कंपनी कायदा आणि मक्तेदारी आणि प्रतिबंधात्मक व्यापार पद्धती (MRTP) आणि केंद्रीय सल्लागार परिषद यासह विविध सरकारी समित्यांमध्ये महत्त्वाची भूमिका बजावली. २००४ ते २०१० पर्यंत महिंद्रा समूहाचे माजी अध्यक्ष पंतप्रधानांच्या व्यापार आणि उद्योग परिषदेचे सदस्य होते. विशेष म्हणजे आज वयाच्या ९९ व्या वर्षी जगाचा निरोप घेणारे ज्येष्ठ उद्योगपती केशब महिंद्रा यांनी टाटा स्टील, टाटा केमिकल्स, आयसीआयसीआय, आयएफसी, स्टील अथॉरिटी ऑफ इंडिया लिमिटेड (सेल) आणि इंडियन हॉटेल्स या कंपन्यांच्या बोर्ड आणि कौन्सिलमध्येही काम केले आहे.
