एकनाथ शिंदे यांची जादू मोठ्या पडद्यावरही चालली, पहिल्या दिवशी ‘धर्मवीर २’ची कोट्यवधींची कमाई

एकीकडे हिंदी, दाक्षिणात्य चित्रपट बॉक्स ऑफिस कलेक्शनसाठी बॉक्स ऑफिसवर संघर्ष करत असतानाच मराठी चित्रपटांची धो-धो कमाई होताना दिसतेय. नुकत्याच प्रदर्शित झालेल्या धर्मवीर २ चित्रपटाला पहिल्या दिवशी चांगला प्रतिसाद मिळाल्याचं दिसून आलं आहे. पहिल्या दिवशी या चित्रपटानं तब्बल १ कोटींच्या वर कमाई केली आहे.

‘धर्मवीर ‘ मुक्काम पोस्ट ठाणे हा चित्रपट दोन वर्षांपूर्वी प्रदर्शित झाला होता. २७ सप्टेंबर रोजी ‘धर्मवीर २’ हा मराठी आणि हिंदी या दोन भाषांमध्ये जगभरात प्रदर्शित झाला आहे.आनंद दिघेंच्या आयुष्यावर बेतलेल्या या चित्रपटानं बॉक्स ऑफिसवर बक्कळ कमाई केली होती. त्यामुळं निर्मात्यांनी काहीच महिन्यात दुसऱ्या भागाची घोषणा केली होती. आता या चित्रपटाचा दुसरा भाग प्रेक्षकांच्या भेटीला आला आहे. या चित्रपटाची सुरुवातही दमदार अशी झाली आहे. पहिल्या दिवशी सिनेमानं कोट्यवधीचा गल्ला जमवला आहे.

sacnilk च्या रिपोर्टनुसार ‘धर्मवीर २ साहेबांच्या हिंदुत्वाची गोष्ट…’ या चित्रपटानं पहिल्या दिवशी तब्बल १.६५ कोटींची कमाई केली आहे. दरम्यान, मराठी सिनेमांसाठी १ कोटींच्यावर झालेलं ओपनिंग हे सकारात्मक असून येत्या काही दिवसांत सिनेमाच्या कमाईत आणखी वाढ होण्याची शक्यता आहे.

दोन साहेबांची गोष्ट
हा सिनेमा आनंद दिघेंच्या आयुष्यावर बेतलेला आहे, असं सांगण्यात येत असलं तरी एकनाथ शिंदे यांच्यावरही सिनेमात जास्त भर देण्यात आला आहे. आनंद दिघे यांचं ‘हिंदुत्व’ आणि शिवसैनिकांचा ‘स्वाभिमान’यावर सिनेमाची कथा उभारण्यात आली आहे. राजकारणात रस असलेल्या प्रेक्षकांना हा चित्रपट लवकर कळणार आहे. पण ज्यांना राजकीय घटनांची माहिती नाही, त्यांचा मात्र गोंधळ होण्याची शक्यता आहे.

…म्हणून प्रदर्शन पुढं ढकललं
‘धर्मवीर २’ हा चित्रपट आधी ९ ऑगस्ट रोजी प्रदर्शित होणार होता. राज्यात झालेली अतिवृष्टी, त्यामुळं ओढवलेल्या पूरपरिस्थितीमुळं धर्मवीर २ चित्रपटाचं प्रदर्शन पुढे ढकलण्यात आलं होतं.