मुंबईसह राज्यात भाडेवाढ करण्याचा निर्णय महाराष्ट्र राज्य मार्ग परिवहन महामंडळाने (एमएसआरटीसी) घेतला आहे. एसटीची ही भाडेवाढ १७ टक्के असून आज मध्यरात्रीपासून नवे दर लागू होणार आहेत.
खासगी ट्रॅव्हल्स कंपन्यांनी नुकतीच दरवाढ केली होती. त्यानंतर एसटी महामंडळाकडूनही दरवाढीबाबत विचार केला जात होता. या पार्श्वभूमीवर अखेर महामंडळाने आज मध्यमरात्रीपासून तिकिटांचा दर वाढवण्याचा निर्णय घेतला आहे.
दरवाढीवर काय आहे महामंडळाचं स्पष्टीकरण?
‘केंद्र सरकारचं डिझेल दरावर नियंत्रण नसल्याने हे दर सातत्याने वाढत आहेत. परिणामी महामंडळाचा तोटा भरून काढण्यासाठी ही भाडेवाढ लागू करण्यात आली आहे,’ असं स्पष्टीकरण एसटी महामंडळाकडून देण्यात आलं आहे.
दरम्यान, गेल्या काही दिवसांपासून पेट्रोल-डिझेलसह अन्य गोष्टी महाग झाल्याने आधीच सर्वसामान्यांचं बजेट कोलमडलं आहे. अशातच आता एसटीचा प्रवासही महागणार आहे.
